nove metros

Merquei nove metros de liberdade

a cambio de ser un escravo do mar

Hipotequei o meu destino ao vento

á calma ás ondas á maraxe

Aos trescentos sesenta rumbos do compás

e as noites debaixo do Universo

Merquei nove metros de océano

o acuario eterno onde os meus soños

se mesturan entre cardumes e sereas

Firmei contrato indefinido co ceo

Buscarían sempre os meus ollos

os horizontes e as estrelas!

Merquei novecentos centímetros de pan

de suor de cheirume de traballo

de paciencia de escravitude e de honor

Merquei o meu cadaleito

o mar

Merquei a miña liberdade

o meu barco

E merquei o meu soño

detrás dun timón

xosé iglesias

do libro transfusión oceánica

presentado onte en andel

e haberá crónika