17-9-2015

nana de lampedusa (arrolo negro)

 

 

 

                                            O meu meniño é pequeño

                                             heino de aprender a todo

                                                     a cocer e a amasar

                                             e a meter o pan no forno

                                                    Canción tradicional

 

 

Durme, durme, meu neno

axóuxeres de soños

no ventre da noite

durme

que non hai para ti un nome

na túa terra seca

na túa terra cansa

durme

metralla e cinsa

onde xa non se escoita

o canto das dunas

durme

e non fagas caso

do sal nos meus beizos

é mar que con bágoas

é mar o teu berce

durme

 

No alén

os oboes da terra prometida

 

Durme…

 

 

maría xosé fernández

 

 

texto publicado no libro

do festival da poesía do condado

imaxe da aldea de barciela de negreira

de muñiz coa baixa das augas do encoro